Dareenkaaga Kaasho: Gabay xiiso badan Bye- Siciid Bulhan Ali.

Gabay-(GMN) Gabaygan waxaa tiriyay Siciid Bulahan Ali oo ah mu’alif da’yar kuna nool dalka Maraykanka gobolka Ohio, waxa uuna tusaalaynayaa xaaladaha cakiran iyo doorka dhalinta, kabogasho wacan.

Xayn daabka dunidaan daa’inbaa abuuroo

Isagaa dulleeyoo sharfa duulka uu rabo

Deeq bixiye weeyaan cidduu rabo u diidoo

Dulmi wuu kadheer yahay ruux qura ma duudsiyo

Badaha dengigiyo wabiyada durdurayiyo

Daruuraha rukaantaa hadba degel abaarsaday

U darroorsha dhibicdoo dooggiyo cagaarkana

Xooluhu ku dararaan aadmigu ku diirsado

Dayixiyo xiddigihiyo cirka dabaqyadaa iyo

Shamso daalac nuurkeed cidna ay dafiri Karin

Falaggaa isdaba mari duhurkiyo dharaartiyo

Gudcur dumay habeenimo marna aan isdiidayn

Dabuub qura kuyiri kun dabadeed ahaadeen

Rasuulkeenna doorkaa loo doortay uunkoo

Cilmi daahiro wacan ku dejiyay korkiisoo

Qaaru xira daloolkii isago dengiigsaday

Loo diray jibriiloo iqra deedna uu yiri

Aqoonbaa ladaahfuray jahliba ladabar jaray

Culuuntii dahsoonayd wax daboolka laga rogo

Dabiib iyo dhaqaatiir waxay daawo keenaan

Duuliyaa cirbixiyaa wuxu dawaafo meeraha

Arladeenni dihinayn waxa daakhil loo dhaco

Dahab iyo macaadiin dusha sare lasoo dhigo

Dulucdiyo ujeedada duxda hadalka oo idil

Dabuubtaydu waxay tahay dammiin aan wax baran iyo

Kan culuunta daalacan damiirkaaga kaashoo

Isku door miyaayoo derejada masiman yiin?

Duurka ruuxa joogee duun yada dhaqaayee

Idihiyo dameeraha daba jooga xoolaha

Ka dahaaran maankoo deel iyo woow an garanayn

Iyo dirica goor hore u dareera macadyada

Duruustiis ka adagoo A+  ka soo degin

Dareen kaaga kaashoo derejada masiman yiin?

Aadmigu dirkii hore cawrada madedan jirin

Dires yada laqaatana dadku muusan heli Karin

Nin doorkaa wuxuu laa harag dabada lagu xiro

Maalmahan dambeetana xariir daahyo laga dhigay

Derbiyada la saaraa oo lagu daboolaa

Xaragada daraadeed suudad taayo lagu daray

Maalmaha dalxiisyada dayaafadaha lagu tago

Dareenkaaga kaashoo derejada masiman yiin?

Beri hore dagaalada diritiyo colaadaha

Difaac weerar kulaytahay faraskaa dabbaabad

Taangiga wax dumiyana kaba door wacnaayoo

Golxob laysku dooxiyo waran deegta laga rido

Dirham laguma heli Karin fallaadhuna kasii daran

Doorkan maanta joognana diyaarad waxaa jira

Dusha cidi kasaarnayn iska duula kaligood

Holac iyo dambaaburo danab iyo sawaariiq

Madaafiic wax dumiyana ku duqeeya gooboo

Dukun daakun kaga dhiga soo duuba sirahana

Dareenkaaga kaashoo derejada masiman yiin?

Gobanimo udirirkii ragbaa dhiig u daadshee

Sayidkii daraawiish ku difaacay gaalee

Koofil kii deldelayee ingiriis dulleeyiyo

Kii diiday gaal daacuflaa inuu daba galaa iyo

Dillaaliintan maantee damiir aan lahaynee

Doolar inay helaan iyo inay daaro jeexdaan

Dan kalaba lahaynee u danaynin ruux qura

Dib jirradan annaaxayn badihii doc iibsaday

Dareen kaaga kaashoo dadnimada ma simanyiin?

Siyaad doorki noo kacay dadka oo dhan mahadsheen

Dabadheer abaartii dalagga iyo beeriyo

Duun yadu dhammaatee u danqaday walaalihi

Dujuumiyo sablaaliyo dan wadaag sameeyiyo

Duqow iyo dhallaan iyo dumar kiyo raggoo idil

Jahli kii ka dabar jaray qoraal li’ida diidoo

duurka iyo baadiye ardaydii u diray iyo

Kuwan diiddan nabaddee dawladnimo an rabinee

Dibadaha u dhoofkiyo dabaqyo uu rag leeyhay

Dengiigsiga hoteelada qaranimo ka doorbiday

Sharaftii dadnimadana dib inay u gaaraan

Ooy dunida raacaan Shacabka aan ladoonayn

Dareenkaaga kaashoo dadnimada ma simanyiin?

Dooh gabayga aan dhaho dabar aan ku soo xiyo

Waxaan ugu dambaysiin oo ku daayay hadalkii

Da’yartaan wax barataan duqoow hore ayaa tiri

Tiisaba daryeela tan kalana ku sii dara

Doorkiinni weeyaan dadaal mays faraynaa?

Dalka adinka yaw kacay dadka adinka yaw maqan

Taariikhdu waa duug diiwaan kaana lagu qori

Waa baalal dahabliyo kuwo dugul madow ehe

Su’aal weeye diirrane docdeebaad ka gelaysaan?

Da’yartaan wax barataay cudurkii nadashaday

Kii dilay awoowgeen dulligii qabiil kiyo

Duxda dhuuxa gaaree hadba duul walaalaa

Dab dhexdood ka huriyiyo kala dile miyaad noqon?

Mise daadahshaad tahay danyartiyo dulmanahaba

Uddoodaaya baahane kala doorta labadaa

Fursaddiinan dahabkaa dareensiiya aadmiga

Dib inaad u hanataan wixii nalaga daayacay

Curiye: Siciid Bulxan Cali

Gedoonlinenews@gmail.com